You are here
Home > Sisi Lain > MOP > Uang Seribu

Uang Seribu

Ada anak satu ini dia paling manja sudah… Setiap hari tinggal minta uang seribu di dia pu bapak, kalo tidak ada uang dia tra mo sekolah, padahal dia pu bapaknya tu cuma nelayan dan pas beberapa hari ini cuaca lagi buruk jd…

Anak : Bapa, kasih sa uang seribu dulu ka..?

Bapa : Adoooh anak….., Bapa trada uang ini, su tahu cuaca buruk too…

Anak : ahhhhhh…Bapa,, kalo tra mau kasih uang seribu, lebih baik sa berhenti sekolah saja sudah !!

Langsung de pu Bapa ni pikiran…., karena anak ni harapan satu-satunya di keluarga. Akhirnya Bapa ni bilang dengan nada sedih ee…

Bapa : Iyo sudah anak, ko pigi ambil uang di atas lemari tu.

“Anak ni lari pi ambil dengan muka senang eee…”

Pas anak panjat lemari, yang ada di atas lemari tu cuma ada bulpen deng kartu keluarga. Langsung anak ni teriak keras-keras :

Baca juga :  Gara-gara Langit Pu Warna

Anak : Bahhhhhhh.. Bapa trada uang seribu ni…., cuma ada bulpen deng kartu keluarga.

Langsung Bapa balas batariak keras-keras dari ruang tamu.

Bapa : Iooo anaak lebih baik ko coret ko pu nama dari kartu keluarga itu dan langsung ko brenti sekolah sudah…, sa deng ko pu mama mo cetak anak lagi saja…

Leave a Reply

*

Top